Paula Cereixo Barreiro (Gres, Galicia, 1989) é actriz, produtora e comunicadora galega. Licenciada en Comunicación Audiovisual pola Universidade de Vigo e formada en interpretación en Espazo Aberto, desenvolve a súa carreira entre a interpretación, a produción e a creación audiovisual.
Como actriz participou en series e filmes como A Estiba (TVG), polo que foi nomeada aos Premios Mestre Mateo 2022 como mellor actriz secundaria, A Lei de Santos ou Sofía Casanova, a obreira do pensamento. Paralelamente, desenvolveu a súa traxectoria en produción audiovisual en proxectos para televisión e cinema como O Corno.
En 2023 cofundou, xunto a Lucas Terceiro, a produtora Tres Insuas Audiovisuais, con sede en Santiago de Compostela, onde desenvolve labores de produción e desenvolvemento creativo. O seu perfil destaca por unha visión transversal do audiovisual que integra interpretación, narrativa e produción. Actualmente ten pendente de estrea varios proxectos audiovisuais como actriz.