Olloboi 2026

O Olloboi 2026 baixou o pano deixando detrás unha desas edicións que permanecen na memoria: encontro, cinema, e creación compartida coa rapazada como auténtica protagonista.

Durante a mañá, na Muchachada participaron centros educativos de Santiago de Compostela, Rianxo e Boiro. As aulas nas unitarias do Concello de Boiro convertéronse en espazos de imaxinación e rodaxe onde, da man dos cómplices e das informantas da Unión de Muchachas, naceron cinco pezas audiovisuais creadas dende a liberdade, a emoción e a mirada propia da mocidade.

Pola tarde chegou o momento de compartir esas historias. Entre risas, nervios e aplausos, proxectáronse as pezas diante dun público entregado. A obra gañadora foi “Nos vellos tempos”, creada polo alumnado do IES Félix Muriel de Rianxo, unha peza que conseguiu emocionar e conectar coa sala.

A gala final converteu a Abadía de San Enrique nunha auténtica celebración colectiva. Centos de rapazas e rapaces chegados de distintos puntos de Galicia —e tamén do País Vasco— encheron o espazo de enerxía, alegría e cinema. Entre os centros premiados estiveron participantes de Rianxo, Boiro, A Coruña, Arteixo, Vigo, Redondela, Rábade e País Vasco.

O Olloboi péchase unha vez máis confirmando algo esencial: que cando á mocidade se lle dá espazo, tempo e confianza, aparecen historias capaces de emocionar, de facer comunidade e de mirar o mundo doutro xeito.

Queremos agradecer o apoio do Concello de Boiro e da Deputación da Coruña, o patrocinio de Jealsa, JJ Chicolino, Deleite e Eroski e a rede de asociacións, negocios locais e amigues que seguen facendo medrar este encontro ano tras ano: Urdime, Unión de Muchachas, Abadía de San Enrique, o Chiringuito da Retorta, Mascolor, Autos Ramón Outeiral, Clic Publicidade, Quality Impresión, 7 Melicias, Viso e unha mención moi especial para Thais Forján, creadora do universo visual desta edición.

E non queremos olvidarnos do agradecemento máis importante, á rapazada, todos aqueles novos creadores e creadoras sen os que nada disto tería sentido, e ao profesorado que pon o seu tempo e esforzo para permitirlles deixar voar a súa imaxinación.

Vémonos no próximo Olloboi!